Bona Pasca Manna de aprile,
Pasca Santa de Resurressione.
Luche chi arziat da s’isprofundu,
faeddat cun sa limba de sos astros ;
Semene forte isperrat sos crastos
e torrat a frorire in su laore.
Pache e amore, frunza zentile,
nita rosa chi naschit in su sinu;
S’arvore santa de sa Passione,
donat a sos bios pane divinu.
S’Ovu, lacheddu eternu de su mundu,
est ispantu mannu, est istrina.
Su pane pintatu est imboniatu
cun s’armoniosa e sacra arina.
“Amore”, su numene de s’anzone
chi binchet sa morte e onzi male.
“Pache”, caminu de su riu ischitu
chi non timet d’intrare in su mare.
Onzi ferta est surcu pro su tricu
ghettatu in sa terra saliosa,
de sa Vita arcanu misteru anticu
Bona Pasca Manna gloriosa.
