Pasca Manna

Bona Pasca Manna de aprile
Pasca Mazore de resurressione

Luche chi arziat da sas pentumas
Vaedat chin sa limba de sos astros
Semene chi sperrat sos crastos
E torrat a frorire in su laore

Pache e amore sun portzeddos
de rosa chi naschin in su sinu
S’arvore de sa vita chin Passione 
Donat a sos bios alimentu divinu

S’Ovu, lacheddu de su mundu
Est ispantu mannu, est istrina 
Su pane pintatu est imboniatu
Chin s'armoniosa e sacra arina 

"Amore" est su numene de su frore
Chi inghet sa morte e onzi male
Pache su caminu de su riu ischitu
Chi non timet a intrare in su mare

Sa Fenitze essit radiosa dae sa chisina
Onzi ferta est surcu pro su tricu 
Ghettatu in sa terra saliosa 
Su ilu chi cusit manzanu e sero
Est tessitu da una manu gloriosa

Bona Pasca Manna de Resurressione

Pasca Manna pro sa Pache

Tòrranos sa Pasca, Sennore!

Dàinos sa Pache in sa Terra!
Tzelen sos lampos de sa gherra
Tzelen odiu, velenos e rancore

Pro sa Sua dolorosa Passione
Tene pietate de su mundu intreu!
Pro sa Ruche Sacra dai recreu
E sa Pasca de Resuressione!

De sa pretziosa sacra Ruche
Arbore d'eterna vita vera
Juchimos animosos un'ispera
chi torret dai Susu sa Luche

Arbore de Sole luchente
Sinnale de s'Onnipotente
Consolazione a su credente
Recattu pro onzi mortale

Arbore eterna, celestiale
Nos diet pache e amore
chi Zesusu Redentore,
ponzat remediu a ogni male

Arbore ‘e Ruche de sarvamentu 
Ascurta in Terra ogni lamentu!
Arbore istimata, beneita pianta,
dàinos a tottus sa Pasca Santa!

Pasca Manna 2023

Pasca manna de Resuressione
Bona Pasca a su mundu intreu
Misericordia, pache e ricreu
in su coro de ogni pessone

Pasca Manna siet de allegria
ca comente nos an contatu,
Gesù Cristu, fizzu de Maria,
pro nois est ressussitatu

Pasca Manna de liberazione
Sa morte in gloria at mutatu
A tre dies da sa crutzifissione
supra su male at trionfatu

An bistu aperta sa losa
anzelos chin beste luchente
Bona Pasca armoniosa
Augurios a tottu sa zente

Pasca manna de su Redentore
fortzeri riccu de ogni vertute
Pasca manna de eternu Amore
dona nos grassias e salute

Pasca Manna beranile
Siet de gosu in tottu sa Terra
Su toccu de su campanile
Che ochet onzi sonu de gherra

Pasca Manna siet aberu
de pache, amore e ditzosia
A tottus un auguriu sinzeru
Bona Pasca in cumpanzia

Traduzione:
Pasqua di Resurrezione
Buona Pasqua al mondo intero
Misericordia, pace e gioia
nel cuore di ogni persona

Pasqua sia di allegria
Perché come ci han raccontato
Gesù, figlio di Maria
per noi è risuscitato

Pasqua di Liberazione
La morte in gloria ha trasformato
Al terzo giorno dalla crocifissione
sul male ha trionfato

Hanno visto aperta la tomba
e angeli in vesti lucenti
Buona Pasqua armoniosa
Auguri a tutte le genti

Pasqua del Redentore
Forziere ricco di ogni virtù
Pasqua di eterno Amore
donaci grazia e salute

Pasqua primaverile
sia di piacere a tutta la Terra
Il tocco nel campanile
mandi via ogni suono di guerra

Pasqua sia davvero
di pace, amore e allegria
A tutti un augurio sincero
Buona Pasqua in compagnia 

Pasca Manna 2022

Tòrranos sa Pasca, Signore,
Dàinos sa pache in sa Terra
Tzelen sos lampos de sa gherra
Tzelen odiu, velenos e rancore

Pro sa Sua dolorosa Passione
Tene pietate de su mundu intreu
Pro sa Ruche Sacra dai recreu
E sa Pasca de Resuressione

De sa pretziosa Sacra Ruche
Arvore d'eterna vita vera
juchimos animosos un'ispera
chi torret dai Susu sa Luche

Arvore de Sole luchente
sinnale de s'Onnipotente
consolazione a su credente
recattu pro ogni mortale

Arvore eterna, celestiale
Nos diet pache e amore
chi Gesù, su Redentore
ponzat rimediu a ogni male

Arvore istimata, beneita pianta
A tottus Bona Pasca Santa

Bona Pasca Manna - Buona Pasqua

 

Bona Pasca ‘e Aprile a tottus

Pasca Manna senza processione

Ma in su coro de ogni pessone

Siet de veru gosu s’Incontru 

Pasca manna de resuressione

Diet a nois e a su mundu intreu

Misericordia, pache e recreu 

e sa disizata liberazione 

Bona Pasca a ogni cristianu

Pasca siet de pache e armonia 

A su credente e a su profanu

A tottu sa Terra e a ogni zenia

 

Pasca Manna 2020

Bona Pasca Manna, amicos caros
tenimos passientzia ca de sicuru
ata a iscrarire su chelu iscuru
e nos amos a bidere tottus sanos

De sa pretziosa Santa Ruche
Arvore d'eterna Vita vera
juchimos animosos un'ispera
chi torret dai Susu sa Luche

Arvore 'e pache celestiale
fruttu de sa Divina Passione
chi Gesu, su Redentore
ponzat rimediu a ogni male

Arvore de Sole luchente
sinnale de s'Onnipotente
consolazione a su credente
recattu pro ogni mortale

A sos caros nostros istimatos
andat ogni bonu pensamentu
Bona Pasca, custa de ocannu,
menzus de custa, ateras chentu
(Caterina Ortu)

Pasca 'e Aprile 2019

Bona Pasca Manna a tottu cantos

Sonat a toccu 'e festa sa campana
In cantos de gloria e innos santos
Pache a sa zente vicina e lontana

Pache e armonia in tottu sa Terra
Torret sa Luche in su chelu beranile
Tzelen lampos e tronos de sa gherra
Pache vera in custa Pasca 'e aprile

Pro sa Sua dolorosa passione
Tenzat pietate de su mundu intreu
Confortu diet a affrizitos e recreu
Recattu a poveros d'ogni nazione

Lassamos sa tristura amicos caros
Aperimos a s'Amore sa janna
A nos bidere metas annos sanos
Augurjos e Bona Pasca Manna

Pasca Manna - Buona Pasqua 2017

Bona Pasca 'e aprile  a  tottus cantos

chin allegria e pache la passedas

custa de ocannu e ateras medas

semper chin fortuna e senza affannos

Ocannu ghettat abba ma est eranu

tandho chi siat prenu 'e tricu doratu

su terrinu chi vois azis semenatu

e bos luchet de grazias su manzanu

E Gesus Cristu chi est risuscitatu

chin sa gloria de anzelos e santos

diet a su mundu nostru su recatu

a sos affrizidos consolet sos prantos

donet pache a sas famiglias in atritu

Bona Pasca 'e aprile a tottus cantos