Bona Pasca de Natale

Anninnia anninnia prenda 'e oro
Drommi e non timmas, anninnia
su sonnu malu non ti tenzat ischitu
ca a juchere sa pache in ogni coro
su Pizzinneddu stanotte est naschitu 

Su Pizzinneddu santu est naschitu
in sos urtimos poveros d'onzi zenia
In barcones  pertos in mare vrittu
In sas biddas in gherra o carestia 
Dormi vida 'e coro, riposa e anninnia 

S'est fattu minore Deus immortale 
In d'onzi pizzinnu de su mundu
chi juacat pache a ogni mortale
ca semus tottus fruttos d'unu 'undu
Custu s'auguriu pro Pasca 'e Natale 

Chi tottus sos pizzinnos de sa Terra
d'onzi colore, d'onzi nazione o etnia
vivan in unu mundu senza gherra
jochen senza affannu o timoria
Dormi vida e coro, riposa e anninnia 

Benennita Giuliana! Benvenuta Giuliana!

Ite bella notissia oje amus tentu
Unu frore delicatu, rosa galana
Pro su coro durcore e cuntentu
Est naschita, si narat Giuliana 

Non b’at in vita prus bella cosa
De una creatura chi enit a su mundu
Non b’at atera prenda prus preziosa
de un’isteddu, gososu e iocundu 

Sinnale de sa grazia ‘e su Signore
Carignu dai Susu a sa mama dizosa
Ca in coro connoschet sa Creazione
Nd'at tentu in su sinu loa armoniosa 

Augurios a sa mama premurosa
Augurios a su babbu ninnatore
A la idere manna e istimata isposa
E bennere a bonu ogni passione 

Augurios a tie, netichedda cara,
de crescere sana in bellesa e amore
cuntenta e sicura, chenza timore
benennita sies tue, bella Giuliana!