Benennita Giuliana! Benvenuta Giuliana!

Ite bella notissia oje amus tentu
Unu frore delicatu, rosa galana
Pro su coro durcore e cuntentu
Est naschita, si narat Giuliana 

Non b’at in vita prus bella cosa
De una creatura chi enit a su mundu
Non b’at atera prenda prus preziosa
de un’isteddu, gososu e iocundu 

Sinnale de sa grazia ‘e su Signore
Carignu dai Susu a sa mama dizosa
Ca in coro connoschet sa Creazione
Nd'at tentu in su sinu loa armoniosa 

Augurios a sa mama premurosa
Augurios a su babbu ninnatore
A la idere manna e istimata isposa
E bennere a bonu ogni passione 

Augurios a tie, netichedda cara,
de crescere sana in bellesa e amore
cuntenta e sicura, chenza timore
benennita sies tue, bella Giuliana!