Annu nou 2024

Intrat s’annu nou a passu lezzeru
e bisos e disizos piccan bolu
e sos pensamentos e s’isperu
ziran chin su tempus curridolu

Atera pazina, ateru fozu biancu
de iscriere in su libru de sa vita,
sien bonas novas, assumancu,
pinturas galanas chin s’iscritta

Chi s’annu nou accattet sa via
frorizzata de gosos e durcore,
onzi die de salute e losania,
onzi passu de pache e amore

Benennitu anno nou luchente,
tesse in oro sas tramas de sas dies!
Su tempus siet amicu, bona zente,
bono prinzipios e menzus fines

 

Bona Pasca Manna - Buona Pasqua

 

Bona Pasca ‘e Aprile a tottus

Pasca Manna senza processione

Ma in su coro de ogni pessone

Siet de veru gosu s’Incontru 

Pasca manna de resuressione

Diet a nois e a su mundu intreu

Misericordia, pache e recreu 

e sa disizata liberazione 

Bona Pasca a ogni cristianu

Pasca siet de pache e armonia 

A su credente e a su profanu

A tottu sa Terra e a ogni zenia

 

Bonos printzipios e menzus fines - Buon Anno 2021

S’annu etzu finamenta ch’est andatu
ana accabbare malauras e traschias
finin sas oras de s’annu bisestratu
picchet s’annu benitore bonas vias

S’annu novu enzat bene assortatu
siet pro tottus, minores e mannos,
annu ditzosu, de istrinas garrigatu
de gosu e galanias, chenza dannos
 
siet tempus de fortuna, de riscatu
un annu grabosu chin craras dies
de pache e armonia in sos fochiles
de nottes tranquillas ammantatu
 
auguriu a tottus, vicinos e lontanos
ateros metas annos a nos vides
semper cuntentos e tottus sanos
bonos printzipios e menzus fines

Augurios a chent'annos a Roberta

Sa vita est che barca in mes’e mare

artziat sa vela e zirat su timone

abellu iniziat sa navigassione

chin unu bonu isteddu pro andare

chin chie cheres pro t’accumpanzare

ti auguramus de sichire su viazzu

de affrontare su tempus chin corazzu

e onzi traschia e unda mala iscansare

sicura, zira timone chin espertesa

non timmas de picare in artu mare

nudda e nessunu ti potat facher male

potas accatare sa durche meta attesa

chi tenzas amore, ricchesa, fortuna

su viazzu siet semper senza affannos

t’assistat in su mare bona luna

augurios Roberta a chent’annos!

Est Pasca de Natale. È Natale.

Naschind’est in sa notte prus manna

Su fizzu de Deus, su Pizzinneddu
che unu poveru, in d'una capanna
umile, chenza difesa, minoreddu

"Gloria" cantan sos anzelos in Chelu
pache in Terra a omines ‘e bonu zelu

sos isteddos luchen in su mantu
naschind’est su nostru Redentore
A s'affrizitu consolat su prantu
donat isperanza, pache e Amore

Sos anzelos cantan sa melodia
s’Isteddu luchente iscrarit sa via

naschind’est pro nois su Messia
a iuchere perdonu a su mortale
a che torrare a sos frates s'armonia
a che occare s'odiu e ogni male

Augurios a tottus, est Pasca de Natale