Augurios a chent’annos coro meu

Augurios a chent’annos coro meu
Son settantasette ziros de chelu 
Chi in ocros nde tenes su colore
Augurios, metas annos chin amore

Su tempus bolat, gai est decisu
Niunu tenet potere 'e lu firmare 
Mantene in coro gosu e sorrisu
Impare andamus a imbezzare

Non tenimus ateru pensamentu
Solu de sichire a nos istimare 
Finzas chi bat luche, onzi momentu
Senza timore de su chi potet capitare

Finzas chi b'est amore e passione
chi nos cherimus che sa prima die
Consolu mannu tue a mie e jeo a tie
Nos damus in donzi situassione 

Augurios a chentannos coro meu
Mantene su surrisu, senza anneu
Regosizamus su tempus impare
Augurios a chent’annos a campare

Augurios Ugo e a chent'annos

Augurjos Ugo e a chent’annos

tene corpu sanu e mente lestra

a sichire su viazzu senza dannos

pedes, ancas e inucros addestra 

de su tempus cura sos malannos

vinzas senza andare in palestra

bastat andare a passos mannos

impare, tue a manca, jeo a destra 

abellu, senza presse, in su sicuru

andamus nois cuntentos e sanos

in armonia contamos sos eranos

unu de s’ateru, chentu jeo e tue puru 

non manchet corazzu e energia

virtute, sereniate e bonu umore

gosu e galania a illichidire sa via

augurios a chent’annos chin amore

Augurios Ugo a chent'annos

Augurios Ugo a chent'annos
chin salute, pache e allegria
a los contare impare sos annos
semper unitos in Amore e armonia

Su battoro de natale intre die
su mille e noichentos barantasese 

naschitu ses in Montevecchio, inie,
urtimu de sos fizzos, su 'e trese

In cussa die de 'esta no ischias
chi teniamos impare unu destinu
de nos accattare in su camminu
pro parare impare sas traschias

traschias de passione, senza dannu
de bentos e undas durches de gosos
in sas vias de s'Amore e coro mannu 

Contandelos impare a chent'annos