Su Battijare de Rachele

In custa die luchente de beranu
carignu a su coro, durche mele
ses tue, froricheddu galanu,
prenda pretziosa, bella Rachele!             
 
chin s’istireddu de su battijare
pares isposa de bellesa rara
a retzire in supra s’altare
su Sacramentu de cristiana
 
onorabbonas, netichedda cara!
chi s’Ozu Santu e s’Abba Beneita
ti dien fortuna, salute, longa vita
bonu coro e mente crara
 
luchizata de grassias siet sa via
allicchidita de pache e amore
frorizzata de gosos e allegria
e bonistrinas dae su Sennore.

A Rachele

Ite ispantu ses, bella Rachele!

Tue e sa cara sorrichedda, 

Ses de mama e babbu mannosia,

e de jajos, istimata pizzinnedda!

Vantu mannu vinzas de sa tzia

chi dai coro ti iscriet in poesia

e ti augurat in vita ogni bene.

Ses istrina chi Deus non ha datu

durchore e cunfortu a su coro

preziosu isteddu, frore delicatu

musica armoniosa, prenda ‘e oro.

In su longu camminu benefatatu

sa Fortuna ti accumpanzet fidele

bona vita ditzosa, bella Rachele!