Notte de chelu - Pasca de Natale

Bona Pasca de Natale

Notte de chelu, muta dae s’ispantu,
ca est naschitu su Fizu divinu
Pro sa pache su Pizzinneddu santu
Focu crispu inchendet in su sinu

Benit a donare isperas de amore
tra muros chi torran a istare abitu.
Alligrat su coro chin ardore
chi cantat chin s’animu affianchitu

Siet durche morada a onzi criatura
Abbrazzu de sa famiglia istimata
ditzosa coperta firma e sicura
che alas chin paran onzi male.

A tottus diet pache e serenitate
custa nova Pasca de Natale

Settantanoe cordas de vita e amore - Settantanove corde di vita e amore

Oje, coro meu,
in cuncordu, un atteru annu  
contamus, senza anneu
e su tempus, mastru mannu, 
risitu, iscurtat chin recreu,
ca onzi nota tua
tenet sonu durche e craru;

in manos tuas 
sa chitarra est invitu 
a frorire galu
a tesser melodia
pro su tempus benitore 
chentza presse, 
chentza timoria;

onzi corda tintinnande
narat de su corazzu
cantat de s’amore
de sa galania 
de sos passos impare
de cussos benitores
prus lizzeros andande.

A chent’annos, prenda ‘e oro,
cumpanzu de viazzu,
ti jucat sa melodia
inumbe narat su coro
e onzi nota nova 
siat auguriu de alligria

Annu Nou - Capodanno 2025

 

Intrat s’annu nou a passu lezzeru
e bisos e disizos piccan bolu
e sos pensamentos e s’isperu
ziran chin su tempus curridolu

Atera pazina, ateru fozu biancu
de iscriere in su libru de sa vita,
sien bonas novas, assumancu,
pinturas galanas chin s’iscritta

Chi s’annu nou accattet sa via
frorizzata de gosos e durcore,
onzi die de salute e losania,
onzi passu de pache e amore

Benennitu anno nou luchente,
tesse in oro sas tramas de sas dies!
Su tempus siet amicu, bona zente,
bono prinzipios e menzus fines

(Caterina Ortu) 

Adiosu Zoseppe

L'as fatta bella s'isfilata

Ma troppu curza in custu mundu 

Nd'asa a fachere metas de prusu

In cuss'ateru mundu de Susu

Sonande tintinnos tzelestiales 

Brincande chind'una garrica dorata

Lepia, chenza impitzos mortales

Chin sos anzelos a ballu tundu

Onzi tantu dai un'ocrata a sos caros!

A sos fizzos e a s'isposa istimata 

Preca a Maria chi lis diet su corazzu!

Pro sichire custu viazzu terrenu

Chin armonia, senz'ateru affannu

In grassias, sutta su Chelu serenu

Su Battijare de Rachele

In custa die luchente de beranu
carignu a su coro, durche mele
ses tue, froricheddu galanu,
prenda pretziosa, bella Rachele!             
 
chin s’istireddu de su battijare
pares isposa de bellesa rara
a retzire in supra s’altare
su Sacramentu de cristiana
 
onorabbonas, netichedda cara!
chi s’Ozu Santu e s’Abba Beneita
ti dien fortuna, salute, longa vita
bonu coro e mente crara
 
luchizata de grassias siet sa via
allicchidita de pache e amore
frorizzata de gosos e allegria
e bonistrinas dae su Sennore.