Bono Printzipios e menzus fines - Buon anno 2026

 Su tempus nou chi naschit craru,
iucat salute e pache in su coro,
ispargat amore in onzi cantu raru
siat carignu, istrina, prenda ‘e oro.

Cando in su libru etzu tancat su pannu,
non serret rimpiantu, ma ammentos
s’arvòre iscriet su caminu mannu
de contos durches e de sentimentos

Benènnidu, annu nou luchente,

chi tentas disizos e isperas,
siat su primu passu ardente,
e s’ùrtimu, luche in anderas.

qustode de indulghidas sinzeras,
cola donosu in d’onzi jannile
chin avrinas gososas e lizeras,
nettu inchinadorzu e bonu impuddile 

(Caterina Ortu) 

Notte de chelu - Pasca de Natale

Bona Pasca de Natale

Notte de chelu, muta dae s’ispantu,
ca est naschitu su Fizu divinu
Pro sa pache su Pizzinneddu santu
Focu crispu inchendet in su sinu

Benit a donare isperas de amore
tra muros chi torran a istare abitu.
Alligrat su coro chin ardore
chi cantat chin s’animu affianchitu

Siet durche morada a onzi criatura
Abbrazzu de sa famiglia istimata
ditzosa coperta firma e sicura
che alas chin paran onzi male.

A tottus diet pache e serenitate
custa nova Pasca de Natale

Settantanoe cordas de vita e amore - Settantanove corde di vita e amore

Oje, coro meu,
in cuncordu, un atteru annu  
contamus, senza anneu
e su tempus, mastru mannu, 
risitu, iscurtat chin recreu,
ca onzi nota tua
tenet sonu durche e craru;

in manos tuas 
sa chitarra est invitu 
a frorire galu
a tesser melodia
pro su tempus benitore 
chentza presse, 
chentza timoria;

onzi corda tintinnande
narat de su corazzu
cantat de s’amore
de sa galania 
de sos passos impare
de cussos benitores
prus lizzeros andande.

A chent’annos, prenda ‘e oro,
cumpanzu de viazzu,
ti jucat sa melodia
inumbe narat su coro
e onzi nota nova 
siat auguriu de alligria

Pasca Manna

Bona Pasca Manna de aprile
Pasca Mazore de resurressione

Luche chi arziat da sas pentumas
Vaedat chin sa limba de sos astros
Semene chi sperrat sos crastos
E torrat a frorire in su laore

Pache e amore sun portzeddos
de rosa chi naschin in su sinu
S’arvore de sa vita chin Passione 
Donat a sos bios alimentu divinu

S’Ovu, lacheddu de su mundu
Est ispantu mannu, est istrina 
Su pane pintatu est imboniatu
Chin s'armoniosa e sacra arina 

"Amore" est su numene de su frore
Chi inghet sa morte e onzi male
Pache su caminu de su riu ischitu
Chi non timet a intrare in su mare

Sa Fenitze essit radiosa dae sa chisina
Onzi ferta est surcu pro su tricu 
Ghettatu in sa terra saliosa 
Su ilu chi cusit manzanu e sero
Est tessitu da una manu gloriosa

Bona Pasca Manna de Resurressione

Annu Nou - Capodanno 2025

 

Intrat s’annu nou a passu lezzeru
e bisos e disizos piccan bolu
e sos pensamentos e s’isperu
ziran chin su tempus curridolu

Atera pazina, ateru fozu biancu
de iscriere in su libru de sa vita,
sien bonas novas, assumancu,
pinturas galanas chin s’iscritta

Chi s’annu nou accattet sa via
frorizzata de gosos e durcore,
onzi die de salute e losania,
onzi passu de pache e amore

Benennitu anno nou luchente,
tesse in oro sas tramas de sas dies!
Su tempus siet amicu, bona zente,
bono prinzipios e menzus fines

(Caterina Ortu) 

Pasca de Natale

A tottus bona pasca de Natale
Pache a su populu de su mundu
Isperanza nova pro ogni mortale
Bisu chi ballat a ballu tundu

A chie su bisu l'at pertu in s'anneu
onzi lacrima ruat in terra saliosa
Nde nascan frores galanos de recreu
e nova vita appachiata e armoniosa

Bonas Pascas a chie non b'est prusu
Ma mai mancat intro de su coro
"Bonas pascas" da su chelu de susu
Est nande chi sos isteddos de oro

Est Pasca de Natale, istrina dorata
A chie isperat e sichit chin corazzu
Pasca de Natale luchet de unu razzu
Chi caentat e cussolat s'anima isporata

Est naschitu pro sa passione
Su Pizzinneddu santu celestiale
Chi iucat a tottus pache e amore
A tottus bona Pasca de Natale 

Traduzione:
A tutti buon Natale
Pace al popolo del mondo
Speranza nuova per ogni mortale
Sogno che danza il "ballo tondo"

A chi il sogno l'ha perso nella tristezza
Ogni lacrima cada in terra fertile
Ne nascano fiori belli di allegrezza
E nuova vita rasserenata e armoniosa

Buone Feste a chi non c'è più
Ma non manca mai nel cuore
"Buone Feste" dal Cielo lassù
Sta dicendo attraverso stelle d'oro

È Natale, dono dorato
A chi spera e va avanti con coraggio
Natale brilla di un raggio
Che riscalda e conforta l'animo affranto

È nato per la Passione
Il Bambinello santo celestiale
Che porti a tutti pace e amore
A tutti buon Natale

Benennita Carla

Non b’at in vita prus bella cosa
De una creatura chi enit a su mundu
Non b’at atera prenda prus preziosa
De un’isteddu, gososu e iocundu

Froricheddu bellu e delicatu
est naschitu su mese de Natale
Carla a numene l’ant datu
de s’Amore de Deus est sinnale

De creschere sana, bella e forte
ti auguro, comente cheres tue,
vita dizosa e de bona sorte
istimata dai tottus in tottue.

Zustu vantu de mama e babbu
tenzas amore, onore e virtute
galania, bonu coro, bellu grabu
gosu mannu, ricchesa e salute

Augurios a sa mama premurosa
Augurios a su babbu ninnatore
A la idere manna e istimata isposa
E bennere a bonu ogni passione

Augurios vinzas a su fraticheddu
A crescher chin sa sorre in armonia 
Nicolò, galanu e durche coricheddu,
Frate ditzosu chin amore e allegria.

chin pacos versos, prenda ‘e oro,
Ti canto custa canzonedda 
e ti auguro onzi bene de coro,
in sa vita benennita, netichedda!