Unu ziru 'e chelu est cumpritu
Un ateru sichit iffattu oracantora
Onzi annu est unu libru iscrittu
Sien pazinas de oro, norabona!
Pazinas de virtute e sabidorìa
Rigas de isteddos e lucura
Istrinas de dies de ditzosìa
De amore, salute e bonaura.
A chent’annos in allegria
Gosande sos carignos de sa vita
Sichinde a piaghere s'iscritta
A largos annos in armonia.
Che arberos chi creschen impare
Chin raicrinas fortes in fundu
Pro resistere a sas traschias de sa vita
Gai semus nois in custu mundu
Arradicatos paris in s’amore
e da sos ramos de sos bisos nostros
ocrin fozas novas a onzi istajone
Vintichimbe ziros de chelu
son colatos da cando, isposos,
amus fattu promissa in s’altare
ma eternale durat s’amore veru.
Onorobbonas, coro meu pretziosu,
A metas annos chi allegria e gosu
Una oche de dolore s'est pesata,
non b'at nudda chi potat cussolare
su prantu de sa mama disisperata
e su babbu non potet atzettare
su dolu mannu de su izzu istimatu,
chi appossiande in su frore de sos annos,
in sa Luche de su Chelu ch’est ‘olatu.
Maria chi cumprendet sos affannos
dai Susu bos diet cuffortu e azutu
e forza e corazu in custa die 'e luttu.
Da s'ispada chi su coro bos at fertu
Nde accat ocrire un ateru frore apertu
Custu modu solu tenzo de ispriccare
pacas rimas ebbia, a bos abbratzare
Intrat s’annu nou a passu lezzeru
e bisos e disizos piccan bolu
e sos pensamentos e s’isperu
ziran chin su tempus curridolu
Atera pazina, ateru fozu biancu
de iscriere in su libru de sa vita,
sien bonas novas, assumancu,
pinturas galanas chin s’iscritta
Chi s’annu nou accattet sa via
frorizzata de gosos e durcore,
onzi die de salute e losania,
onzi passu de pache e amore
Benennitu anno nou luchente,
tesse in oro sas tramas de sas dies!
Su tempus siet amicu, bona zente,
bono prinzipios e menzus fines
Ite ispantu ses, bella Rachele!
Tue e sa cara sorrichedda,
Ses de mama e babbu mannosia,
e de jajos, istimata pizzinnedda!
Vantu mannu vinzas de sa tzia
chi dai coro ti iscriet in poesia
e ti augurat in vita ogni bene.
Ses istrina chi Deus non ha datu
durchore e cunfortu a su coro
preziosu isteddu, frore delicatu
musica armoniosa, prenda ‘e oro.
In su longu camminu benefatatu
sa Fortuna ti accumpanzet fidele
bona vita ditzosa, bella Rachele!
In chelu luchet unu isteddu
a sanare tristura e ogni male
naschind’est su Pitzinneddu
a Tie chircamus, fizzu ‘e Deu!
ascurta custa precatoria,
iuche a su mundu s’armonia
iuche a sa mente crara luche
in coro non bi siet che durcore
dona pache, isperanza e salute
e galanias, Santu Redentore!
In sa notte prus manna s’isteddu
de s’amore ‘e Deus est sinnale
aperimus su coro a su Ninnieddu
a tottus bonas Pascas ‘e Natale!
Brevi citazioni di celebri poeti e pensatori, frammenti di amore e di sapienza (agape e sophia).
Agenda della pace, di invito al dialogo e alla conoscenza delle “altre” culture e, nello stesso tempo, di riflessione e di armonia interiore con gli aforismi.
https://ilmiolibro.kataweb.it/libro/poesia/610843/agenda-2022/
Bona Pasca ‘e Aprile a tottus
Pasca Manna senza processione
Ma in su coro de ogni pessone
Siet de veru gosu s’Incontru
Pasca manna de resuressione
Diet a nois e a su mundu intreu
Misericordia, pache e recreu
e sa disizata liberazione
Bona Pasca a ogni cristianu
Pasca siet de pache e armonia
A su credente e a su profanu
A tottu sa Terra e a ogni zenia
S’annu etzu finamenta
ch’est andatu
ana accabbare malauras e traschias
finin sas oras de s’annu bisestratu
picchet s’annu benitore bonas vias
S’annu novu enzat bene assortatu
siet pro tottus, minores e mannos,
annu ditzosu, de istrinas garrigatu
de gosu e galanias, chenza dannos
siet tempus de fortuna, de riscatu
un annu grabosu chin craras dies
de pache e armonia in sos fochiles
de nottes tranquillas ammantatu
auguriu a tottus, vicinos
e lontanos
ateros metas annos a nos vides
semper cuntentos e tottus
sanos
bonos printzipios e
menzus fines
